Bəşəriyyətin bədii söz salnaməsində özünəməxsus yeri olan, dünya ədəbiyyatının günəşi hesab edilən dahi Azərbaycan şairi, mütəfəkkir Nizami Gəncəvinin məqbərəsi anadan olduğu Gəncə şəhərinin yaxınlığında yerləşir. İlk türbənin tikintisi XIII-XIV əsrlərə aid edilir.
Nizami məqbərəsi 1947-ci ildə şairin anadan olmasının 800 illik yubileyi ilə əlaqədar onun dağılmış qədim məzarı üstündə ucaldılmışdır.
Hal-hazırkı məqbərə isə 1990-1991-ci illərdə yenidən qurulmuş, qədim arxitektura ənənələri saxlanılmaqla müasirləşdirilmişdir.
Məqbərə 20,9 m. hündürlüyündə, slindirik formada inşa edilmiş, ətrafında şairin “Xəmsə”sinin rəmzi kimi 5 iri fəvvarə, “Xəmsə”sinə daxil olan əsərlərdən bəhs edən heykəltəraşlıq kompleksi və süni göl vardır.
“Nizami Gəncəvi məqbərəsi” kompleksi Azərbaycan Respublikası Prezidentinin 22 oktyabr 2019-cu il tarixli Sərəncamı ilə Gəncə Dövlət Tarix-Mədəniyyət Qoruğuna daxil edilmişdir.
